العدد الاول من مجلة اسرار الحب والزواج –خبرات ام شابه ( امورتى الحلوه ----وهراسة البطاطس )

مرجزء من فترة خطوبة إبنتى واقترب موعد الزواج وخلاص المفروض اننا نكون جاهزين بالمطلوب
وبالفعل جلسنا معا قبل اى نزول وحددنا الانواع والاشكال والاسعار وعرفنا الجديد فى السوق وكله قشطه خالص

وبالفعل اشترينا كل المطلوب للجهاز وفى وقت قصير وكنا مخلصين وبدون الدخول فى تفاصيل لانكوا كلكوا عارفينها
وتنفست الصعداء وقلت الحمد لله خطوه كبيره وخلصت
بكل تفاصيلها الدقيقه لكن تمت بحمد الله
وكله تمام ولا حاجه ناقصه وكل ماتتمنى العروسه واى خدمه ياباشا لامورتى الحلوه وسادت الابتسامه الوجوه

وفجأه الاقى امورتى الحلوه مجهزه قايمه طويله عريضه نزلتها من على النت وتقول نسينا دا ياقمر اللى هو انا مامتها ماهو شىء لزوم الشىء انتوا فاهمين الحركات دى وامسك القايمه هى حجات يمكن الاستغناء عنها لكن مافيش مشكله منعا للزعل ونجيب القايمه بميلغ وقدره مابين رفايع فى المطبخ زى هراسة البطاطس وقطاعة البيض واشكال قلوب للتقطيع وفيونكات وفرش انواع واشياء وحركات معوجه قوى مالهاش اى فايده لكن بتجمع مبالغ كبيره وقال يعنى البنت شيف وداخله مسابقه ونقول اوكى هانجيب وفعلا ندفع مبلغ وقدره ونجيب ولاتتعجبوا من هذه الاشياء الصغيره انها تجمع مبلغ لايستهان بها

اليوم اللى بعديه ادخل من بره وانا هاموت من الارهاق الاقيها تجرى على وبسرعه تقول تعالى بسرعه شوفى ديكور حجرة النوم اللى شوفتها على النت يجنن وهاستعمل فيه استيكر وهااعمل وهااعمل ومن الاخر عايزه تجيب استيكر ونقول ماشى حاضر ونجيب استيكر

واليوم التالت والرابع والعشرين ان نزيف الرفايع الهايفه اللى مالهاش لازمه يخلص استحاله يخلص ونزيف القوايم اللى بتنزلها من النت يخلص استحاله يخلص لكن الحاجه اللى بتخلص هو صبرى عليها ونزيف المبالغ الكبيره من البنك اللى مش ممكن تصدقوا انها اتصرفت فى شوية الحجات العبيطه دى
تكاد تقترب من المبالغ الكبيره اللى اتصرفت على الاشياء الهامه المطلوبه
هاكملكوا باقى عميلها معايا الحلقه الجايه
انما انتوا ايه رايكم فى ثقافتها فى التجهيز هى صح ولا خطأ؟؟؟؟